ამერიკის ყველაზე შემოსავლიანი კერძო კომპანიები

ფოტო: marshac.co

 

ამერიკულმა Forbes-მა შემოსავლების მიხედვით აშშ-ის უმსხვილესი კერძო კომპანიების რეიტინგი გამოაქვეყნა. 2025 წლის დეკემბრის მონაცემების მიხედვით, ამერიკის ყველაზე დიდი კერძო კომპანია Cargill-ია, რომლის წლიური შემოსავალი 154 მილიარდ დოლარს შეადგენს. მიუხედავად იმისა, რომ ეს მაჩვენებელი ჩამორჩება Amazon-ის $717-მილიარდიან შემოსავალს, Cargill-ის გაყიდვები მაინც აღემატება არაერთი ცნობილი საჯარო კომპანიის ფინანსურ შედეგებს.

1865 წელს დაარსებული Cargill-ი დღემდე კერძო საკუთრებაშია. კომპანია მინესოტაშია დაფუძნებული და მსოფლიოში სოფლის მეურნეობის პროდუქტების ერთ-ერთი უმსხვილესი მწარმოებელია, მათ შორის მარცვლეულის, ხორცისა და პალმის ზეთის მიმართულებით.

კომპანიაში 150 000-ზე მეტი ადამიანი მუშაობს, ხოლო მისი ოპერაციები 70 ქვეყანაზე ვრცელდება.

Cargill-ი აშშ-ის მარცვლეულის ექსპორტის დაახლოებით მეოთხედს უზრუნველყოფს. ამასთან, კომპანია მსოფლიოს ოთხ უმსხვილეს ხორცპროდუქტების მწარმოებელს შორისაა და მასზე ამერიკაში წარმოებული ხორცის მეხუთედზე მეტი მოდის. 2026 წლის მდგომარეობით, კომპანიის 85%-ზე მეტ წილს კაგილ-მაკმილანის ოჯახი ფლობს.

რეიტინგში კვებისა და სასურსათო ბიზნესების უპირატესობა აშკარად იგრძნობა. ტოპ-15 კომპანიიდან მნიშვნელოვანი ნაწილი სწორედ ამ სექტორში ოპერირებს.

მათ შორისაა Mars-ი, რომლის წლიური შემოსავალი 55 მილიარდ დოლარს აღწევს. კომპანია ცნობილია ისეთი ბრენდებით, როგორებიცაა Snickers-ი, M&M's-ი და Skittles-ი. გარდა ამისა, იგი შინაური ცხოველების საკვების ერთ-ერთი უმსხვილესი მწარმოებელიცაა.

უმსხვილეს კერძო კომპანიებს შორის შემოსავლით მოწინავე პოზიციებს იკავებენ ასევე Publix Super Markets-ი ($59.7 მილიარდი დოლარი), H-E-B Grocery Company ($49.6 მილიარდი), Reyes Holdings-ი ($44 მილიარდი), Southern Glazer's Wine & Spirits-ი ($25 მილიარდი), Gordon Food Service-ი ($23 მილიარდი) და Meijer-ი ($22 მილიარდი).

#	კომპანია	ინდუსტრია	წლიური შემოსავალი (მლრდ, $)
1	Cargill	კვება და სასმელი	154
2	Koch	დივერსიფიცირებული კონგლომერატი	125
3	Publix Super Markets	სასურსათო საცალო ვაჭრობა	59.7
4	Mars	კვება და სასმელი	55
5	H-E-B Grocery Company	სასურსათო საცალო ვაჭრობა	49.6
6	Reyes Holdings	საკვები, სასმელი და თამბაქო	44
7	Enterprise Mobility	სერვისები	38
8	Fidelity Investments	ფინანსური მომსახურება	32.7
9	Southern Glazer's Wine & Spirits	საკვები, სასმელი და თამბაქო	25
10	Cox Enterprises	მედია	23.5
11	Bechtel	მშენებლობა	23
12	Gordon Food Service	საკვები, სასმელი და თამბაქო	23
13	JM Family Enterprises	სამომხმარებლო საქონელი	22.8
14	Meijer	სასურსათო საცალო ვაჭრობა	22
15	Love's Travel Stops & Country Stores	ავტოგასამართი და მაღაზიების ქსელი	21.6