ევროპის ქვეყნებს შორის პროდუქტისა თუ მომსახურების ფასები მნიშვნელოვნად განსხვავდება. განსხვავება მკვეთრად შესამჩნევია მეზობელ სახელმწიფოებს შორისაც კი, მაგალითად, როგორიცაა ავსტრია-უნგრეთი ან გერმანია-პოლონეთი.
იმის გასაგებად, თუ რამდენად ძვირი ან იაფია საქონელი და მომსახურება თითოეულ ქვეყანაში, ფასების დონის ინდექსი ყველაზე კარგი საშუალებაა. ფასების დონე ევროკავშირის საშუალო მაჩვენებელთან დარდება და მსყიდველობითი უნარის პარიტეტის (PPP) გამოყენებით გამოითვლება. PPP ხელოვნური ვალუტაა, რომელიც აჩვენებს, თუ რამდენის ყიდვა შეუძლიათ ადამიანებს ერთი და იმავე რაოდენობის ფულით სხვადასხვა ქვეყანაში.
სტატიაში გამოყენებულია Eurostat-ის 2024 წლის მონაცემები. შედეგები 2000-ზე მეტი სამომხმარებლო საქონლისა და მომსახურების ფასებს მოიცავს. კვლევა ევროპის 36 ქვეყანაში ჩატარდა.
2024 წლის მონაცემებით, 36 ქვეყნიდან ყველაზე ძვირი შვეიცარიაა, რომლის ფასები ევროკავშირის საშუალო მაჩვენებლის 184%-ს შეადგენს - საშუალო მაჩვენებელზე 84%-ით მაღალია. ყველაზე იაფი კი თურქეთია, რომლის ფასები ევროკავშირის საშუალო მაჩვენებლის 47%-ს შეადგენს, რაც იმას ნიშნავს, რომ ისინი ევროკავშირის საშუალო მაჩვენებელზე 53%-ით დაბალია. ეს შვეიცარიას თურქეთზე 3.9-ჯერ ძვირს ხდის, რაც ევროპაში ფასების დონის მკვეთრ კონტრასტს ნათელყოფს.
ევროკავშირის წევრებს შორის ყველაზე ძვირი ქვეყანა ლუქსემბურგია. იქ არსებული ფასები ევროკავშირის საშუალო მაჩვენებელზე 51%-ით მაღალია. პროდუქტი და მომსახურება ყველაზე იაფი ბულგარეთსა და რუმინეთშია, ევროკავშირის საშუალო მაჩვენებლის 57%-ით.
ეს ნიშნავს, რომ ლუქსემბურგი დაახლოებით 2.7-ჯერ უფრო ძვირია, ვიდრე ბულგარეთი და რუმინეთი, რაც მნიშვნელოვან, თუმცა უფრო მცირე სხვაობას აჩვენებს შვეიცარიასა და თურქეთს შორის არსებულ სხვაობასთან შედარებით.
აღსანიშნავია, რომ ევროკავშირის ათ ქვეყანაში ფასები EU-ს საშუალო მაჩვენებელზე მაღალია. ლუქსემბურგს სიძვირით დანია (143%) და ირლანდია (141%) მოსდევს.
ევროკავშირის ოთხ უდიდეს ეკონომიკას შორის, გერმანიასა (109%) და საფრანგეთში (108%) ფასები EU-ს საშუალოზე ოდნავ მაღალია, ხოლო იტალიასა (98%) და ესპანეთში (91%) - ოდნავ დაბალი.
| ქვეყანა | ინდექსი |
|---|---|
| შვეიცარია | 184 |
| ისლანდია | 173 |
| ლუქსემბურგი | 151 |
| დანია | 143 |
| ირლანდია | 141 |
| ნორვეგია | 134 |
| ფინეთი | 127 |
| შვედეთი | 123 |
| გაერთიანებული სამეფო (2023) | 123 |
| ნიდერლანდები | 121 |
| ავსტრია | 120 |
| ბელგია | 119 |
| გერმანია | 109 |
| საფრანგეთი | 108 |
| ევროკავშირის საშუალო | 100 |
| იტალია | 98 |
| ესტონეთი | 97 |
| კვიპროსი | 95 |
| მალტა | 93 |
| სლოვენია | 91 |
| ესპანეთი | 91 |
| პორტუგალია | 85 |
| საბერძნეთი | 83 |
| სლოვაკეთი | 81 |
| ჩეხეთი | 80 |
| ლიეტუვა | 78 |
| ლატვია | 77 |
| ხორვატია | 73 |
| პოლონეთი | 70 |
| უნგრეთი | 68 |
| ალბანეთი | 63 |
| სერბეთი | 61 |
| ბოსნია და ჰერცეგოვინა | 60 |
| მონტენეგრო | 58 |
| რუმინეთი | 57 |
| ბულგარეთი | 57 |
| ჩრდილოეთი მაკედონია | 50 |
| თურქეთი | 47 |