გერმანია უკრაინას 2029 წლამდე 11 მილიარდი ევროს ღირებულების სამხედრო დახმარებას გამოუყოფს. ამის შესახებ უკრაინის თავდაცვის მინისტრმა, რუსტემ უმეროვმა X-ზე დაწერა.
„მადლობელი ვარ გერმანელი ხალხისა და მთავრობის, განსაკუთრებით ჩემი კოლეგა მინისტრ პისტორიუსის დღევანდელი განცხადებისთვის, რომ 2029 წლამდე უკრაინისთვის, შემდგომი სამხედრო მხარდაჭერისთვის, 11 მილიარდი ევრო გამოიყოფა“, - აცხადებს უმეროვი.
უმეროვმა 2025 წელს გერმანიის მიერ დაგეგმილი სამხედრო დახმარების პაკეტზეც გაამახვილა ყურადღება. გავრცელებული ინფორმაციით, მასში შედის:
- IRIS-T-ის ტიპის 4 საზენიტო-სარაკეტო ბატარეა და 300 საზენიტო რაკეტა;
- Patriot-ის ტიპის საჰაერო თავდაცვის 30 საზენიტო რაკეტა;
- Leopard-1A5-ის ტიპის 15 ტანკი;
- Marder-ის ტიპის 25 ქვეითთა საბრძოლო მანქანა;
- 100 ათას ერთეულ საარტილერიო ჭურვი;
- 120 გადასატანი საზენიტო-სარაკეტო კომპლექსი;
- 300 სადაზვერვო დრონი;
- 100 რადიოლოკაციური სადგური;
- 14 საარტილერიო სისტემა.
გერმანია ევროპაში უკრაინის ერთ-ერთ მთავარ სამხედრო დონორად რჩება. 19 მარტს გერმანიის ფინანსთა სამინისტრომ დაადასტურა, რომ 2025 წლისთვის უკვე გამოყოფილ 4 მილიარდი ევროს კიდევ 3 მილიარდი ევრო დაემატება.