მსოფლიოს 10 ყველაზე ძვირადღირებული ფეხბურთელი

ფოტო: Getty Images

 

Transfermarkt-მა ფეხბურთელების სატრანსფერო შეფასებები განაახლა. ცვლილებები განსაკუთრებით „პარი სენ-ჟერმენის“ მოთამაშეებს შეეხო, რომლებმაც წარმატებული სეზონის შემდეგ საბაზრო ღირებულება მნიშვნელოვნად გაზარდეს. მათ შორისაა ხვიჩა კვარაცხელია, რომელიც ბოლო განახლების შემდეგ მსოფლიოს ყველაზე ძვირადღირებული ფეხბურთელების ტოპ-10-ში შევიდა.

„პარი სენ-ჟერმენის“ ფეხბურთელების საბაზრო ფასის მატება სხვადასხვა ტურნირზე კლუბის წარმატებასა და მოთამაშეების ინდივიდუალურ შედეგებს უკავშირდება. „პსჟ“-მ, 30 მაისს, UEFA-ს „ჩემპიონთა ლიგის“ ფინალში „არსენალი“ პენალტების სერიაში დაამარცხა და ევროპის ყველაზე პრესტიჟულ საკლუბო ტურნირზე ტიტული ზედიზედ მეორედ მოიპოვა. მანამდე პარიზელები საფრანგეთის „ლიგა 1“-ის თასს დაეუფლნენ.

UEFA-მ 2025/26 წლების სეზონის საუკეთესო ფეხბურთელად ხვიჩა კვარაცხელია დაასახელა. მან ამ სეზონში „პარი სენ-ჟერმენის“ მაისურით 10 გოლი გაიტანა და 6 საგოლე გადაცემა გააკეთა. აღსანიშნავია, რომ კვარაცხელია მატჩის საუკეთესო ფეხბურთელი ოთხჯერ გახდა. ის სეზონის სიმბოლურ ნაკრებშიც მოხვდა.

საფრანგეთის „ლიგა 1“-სა და „ჩემპიონთა ლიგაზე“ წარმატებული გამოსვლის შემდეგ Transfermarkt-მა კვარაცხელიას სატრანსფერო ფასი 50 მილიონი ევროთი, 90-დან 140 მილიონ ევრომდე გაზარდა. შედეგად, 25 წლის ქართველი მსოფლიოს ყველაზე ძვირადღირებული ფეხბურთელების ტოპ-10-ში შევიდა. 

კვარაცხელიასთან ერთად გაიზარდა მისი თანაგუნდელების ღირებულებაც. მათ შორის, ვიტინიასა და ჟოაუ ნევეშის სატრანსფერო ფასმა ასევე 140 მილიონ ევროს მიაღწია. შესაბამისად, ისინი ხვიჩასთან ერთად Transfermarkt-ის ყველაზე ძვირადღირებული ფეხბურთელების ტოპ-ათეულში არიან. 

მოცემული დროისთვის ყველაზე ძვირადღირებული ფეხბურთელის სტატუსს სამი სპორტსმენი ინაწილებს - ლამინ იამალი, რომელიც კატალონიურ „ბარსელონაში“ ირიცხება; ერლინგ ჰაალანდი, რომელიც ინგლისური „მანჩესტერ სიტის“ ღირსებას იცავს; და კილიან მბაპე, რომელიც „მადრიდის რეალში“ თამაშობს. სამივე მათგანის სატრანსფერო შეფასება 200 მილიონ ევროს უტოლდება.

საბაზრო ღირებულებით მეორე ადგილს ასევე სამი ფეხბურთელი იყოფს: პედრი „ბარსელონიდან“, მაიკლ ოლისე „ბაიერნიდან“ და ვინისიუს ჯუნიორი „რეალიდან“. მათი საბაზრო ღირებულება 150 მილიონ ევროს შეადგენს.

ათეულში დარჩენილი ოთხი ფეხბურთელის შეფასება კი 140 მილიონი ევროა. „პარი სენ-ჟერმენის“ ფეხბურთელებთან ერთად, რომლებზეც ზემოთ უკვე ვისაუბრეთ, ამ ნიშნულს უტოლდება „მადრიდის რეალის“ შემტევის, ჯუდ ბელინგემის საბაზრო ღირებულებაც.

მსოფლიოს 10 ყველაზე ძვირადღირებული ფეხბურთელი, Transfermarkt-ის მიხედვით: 

	ფეხბურთელი	კლუბი	პოზიცია	ასაკი	საბაზრო ღირებულება
1	ლამინ იამალი	ბარსელონა	მარჯვენა გარემარბი	18	€200 მილიონი
2	ერლინგ ჰაალანდი	მანჩესტერ სიტი	ცენტრალური თავდამსხმელი	25	€200 მილიონი
3	კილიან მბაპე	მადრიდის რეალი	ცენტრალური თავდამსხმელი	27	€200 მილიონი
4	პედრი	ბარსელონა	ცენტრალური ნახევარმცველი	23	€150 მილიონი
5	მაიკლ ოლისე	ბაიერნი	მარჯვენა გარემარბი	24	€150 მილიონი
6	ვინისიუს ჟუნიორი	მადრიდის რეალი	მარცხენა გარემარბი	25	€150 მილიონი
7	ჟოაუ ნევეში	პარი სენ-ჟერმენი	ცენტრალური ნახევარმცველი	21	€140 მილიონი
8	ჯუდ ბელინგემი	მადრიდის რეალი	შემტევი ნახევარმცველი	22	€140 მილიონი
9	ხვიჩა კვარაცხელია	პარი სენ-ჟერმენი	მარცხენა გარემარბი	25	€140 მილიონი
10	ვიტინია	პარი სენ-ჟერმენი	საყრდენი ნახევარმცველი	26	€140 მილიონი