ფოტო: Chris Welch/Bloomberg
Apple-ის ფლაგმანური სმარტფონის ფასი მსოფლიოს სხვადასხვა ქვეყანაში მნიშვნელოვნად განსხვავდება. მიუხედავად იმისა, რომ კომპანია ერთსა და იმავე მოდელს გლობალურად ყიდის, საბოლოო საცალო ფასი ადგილობრივი გადასახადების, იმპორტის პოლიტიკის, ვალუტის კურსისა და ბაზრის სხვა პირობების მიხედვით იცვლება.
Deutsche Bank-ის მონაცემებზე დაყრდნობით, 2026 წელს iPhone 17 Pro-ის 256GB-იანი ვერსიის ფასი 41 ქვეყანაში ერთმანეთს შეადარეს. კვლევის მიხედვით, iPhone-ი ყველაზე ძვირი თურქეთშია, სადაც მისი ფასი $2,592-ს შეადგენს.
რეიტინგში თურქეთს ბრაზილია და ეგვიპტე მოსდევს. აღსანიშნავია, რომ თურქეთში iPhone 17 Pro-ის ღირებულება აშშ-ში არსებულ ფასზე ორჯერ მაღალია.
აშშ-ში სმარტფონის ფასი $1,181-ია, რაც რეიტინგში ერთ-ერთი ყველაზე დაბალი მაჩვენებელია. იაპონიაში კი იმავე მოდელის შეძენა კიდევ უფრო იაფია, $1,121-ად.iPhone 17 Pro 256GB-ის ფასი შერჩეულ ქვეყნებში ასე ნაწილდება:
| # | ქვეყანა | iPhone 17 Pro 256GB | ფასი აშშ-სთან შედარებით |
|---|---|---|---|
| 1 | თურქეთი | $2,592 | 219% |
| 2 | ბრაზილია | $2,260 | 191% |
| 3 | ეგვიპტე | $1,872 | 158% |
| 4 | უნგრეთი | $1,826 | 155% |
| 5 | ნორვეგია | $1,687 | 143% |
| 6 | მექსიკა | $1,657 | 140% |
| 7 | შვედეთი | $1,601 | 135% |
| 8 | პოლონეთი | $1,588 | 134% |
| 9 | ჩეხეთი | $1,585 | 134% |
| 10 | ფინეთი | $1,578 | 134% |
| 11 | პორტუგალია | $1,566 | 133% |
| 12 | საბერძნეთი | $1,566 | 133% |
| 13 | იტალია | $1,554 | 132% |
| 14 | ირლანდია | $1,554 | 132% |
| 15 | დანია | $1,553 | 131% |
| 16 | საფრანგეთი | $1,543 | 131% |
| 17 | ნიდერლანდები | $1,543 | 131% |
| 18 | ბელგია | $1,543 | 131% |
| 19 | ესპანეთი | $1,531 | 130% |
| 20 | ავსტრია | $1,508 | 128% |
| 21 | გერმანია | $1,508 | 128% |
| 22 | ლუქსემბურგი | $1,492 | 126% |
| 23 | გაერთიანებული სამეფო | $1,476 | 125% |
| 24 | ინდოეთი | $1,427 | 121% |
| 25 | ავსტრალია | $1,413 | 120% |
| 26 | საუდის არაბეთი | $1,386 | 117% |
| 27 | შვეიცარია | $1,385 | 117% |
| 28 | ახალი ზელანდია | $1,370 | 116% |
| 29 | სინგაპური | $1,364 | 115% |
| 30 | მალაიზია | $1,352 | 114% |
| 31 | ტაილანდი | $1,350 | 114% |
| 32 | ჩინეთი | $1,332 | 113% |
| 33 | ვიეტნამი | $1,330 | 113% |
| 34 | ფილიპინები | $1,326 | 112% |
| 35 | კანადა | $1,291 | 109% |
| 36 | არაბთა გაერთიანებული საამიროები | $1,279 | 108% |
| 37 | ტაივანი | $1,264 | 107% |
| 38 | ჰონგ-კონგი | $1,200 | 102% |
| 39 | აშშ | $1,181 | 100% |
| 40 | სამხრეთი კორეა | $1,181 | 100% |
| 41 | იაპონია | $1,121 | 95% |
სმარტფონის ღირებულება მხოლოდ Apple-ის მიერ დადგენილ რეგიონულ ფასზე არ არის დამოკიდებული. საბოლოო ღირებულებაზე მნიშვნელოვანი გავლენა აქვს სახელმწიფო გადასახადებს, იმპორტის მოსაკრებლებს, რეგულაციებთან დაკავშირებულ ხარჯებსა და ადგილობრივ საგადასახადო პოლიტიკას.
განსაკუთრებით თვალსაჩინოა ევროპული ქვეყნების პოზიციები. რეიტინგის ზედა ნაწილში ევროპის არაერთი ქვეყანა მოხვდა, რაც ნაწილობრივ დამატებული ღირებულების გადასახადით (VAT) აიხსნება. მაგალითად, უნგრეთში სტანდარტული VAT-ის განაკვეთი 27%-ია, მაშინ როდესაც შვეიცარიაში ის 8%-ზე ოდნავ მეტია.
ფასზე გავლენას ახდენს ვალუტის კურსიც. როდესაც ადგილობრივი ვალუტა აშშ დოლართან მიმართებით სუსტდება, კომპანიებს რეგიონული ფასების გადახედვა შეიძლება დასჭირდეთ.
თურქეთში iPhone-ის მაღალი ფასი რამდენიმე ფაქტორის ერთობლიობითაა განპირობებული. ქვეყანაში სმარტფონებზე 20%-იანი VAT, სპეციალური მოხმარების გადასახადები და მოწყობილობის რეგისტრაციისთვის საჭირო დამატებითი მოსაკრებლები მოქმედებს.
რეიტინგის ბოლოში იაპონიაა. ქვეყანაში iPhone 17 Pro-ის 256GB-იანი ვერსია $1,121 ღირს, რაც აშშ-ის $1,181-იან ფასზე დაბალია.
იაპონიაში შედარებით დაბალი, 10%-იანი გადასახადი, სმარტფონების კონკურენტული ბაზარი და Apple-ის ხანგრძლივი საფასო პოლიტიკა ფლაგმანური მოდელის შედარებით დაბალ ფასს განაპირობებს. თუმცა იაპონიაში Apple-მა ბოლო პერიოდში ზოგიერთი პროდუქტის ფასი გაზარდა. ამის ერთ-ერთი მიზეზი იენის ხანგრძლივი გაუფასურება და გაცვლითი კურსების ცვლილებაა.
ცნობისთვის, საქართველოში, რომელიც ზემოხსენებულ რეიტინგში განხილული არ არის, iPhone 17 Pro-ის 256GB-იანი ვერსია დაახლოებით 4,000 ლარი ღირს, რაც $1530-ს უტოლდება.