ამერიკულმა Forbes-მა მსოფლიოს უმსხვილესი კომპანიების 2025 წლის რეიტინგი – Global 2000 გამოაქვეყნა. რეიტინგი გაყიდვების, მოგების, აქტივებისა და საბაზრო ღირებულების მიხედვითაა შედგენილი. მონაცემები აღებულია 2025 წლის 25 აპრილის მდგომარეობით.
Forbes Global 2000-ის რეიტინგში, ზედიზედ მეორე წელია, საცალო ვაჭრობის უმსხვილესი კომპანიის სტატუსს ჯეფ ბეზოსის Amazon-ი ინარჩუნებს, რომელიც საერთო სიაში მე-5 პოზიციაზეა. შეგახსენებთ, ამ უკანასკნელმა რეიტინგში ლიდერობა 2023 წელს Walmart-ის მიერ დროებით ჩანაცვლების შემდეგ დაიბრუნა. სიაში Amazon-ის პოზიციები გარკვეულწილად გაყიდვების წლიურ ჭრილში დაახლოებით 8%-ით ზრდამ გაამყარა, რის შედეგადაც მაჩვენებელი თითქმის 638 მილიარდ დოლარს გაუტოლდა.
Global 2000-ის საცალო ვაჭრობის ხუთ უმსხვილეს კომპანიას შორის Amazon-ის გარდა ვხვდებით მის კონკურენტებს: Walmart-ს, რომელიც საერთო სიაში მე-18 ადგილზეა, Alibaba-ს – 33-ე ადგილზე, Home Depot-ს – 67-ე ადგილზე და Costco-ს – 93-ე ადგილზე.
აშშ-ის ვაჭრობის დეპარტამენტის მონაცემებით, მომხმარებელთა ხარჯების ზრდით წლის განმავლობაში თითქმის ყველა მათგანმა ისარგებლა. მისივე ცნობით, 2024 წლის აპრილიდან 2025 წლის აპრილამდე, ამერიკის შეერთებულ შტატებში მომხმარებელთა ხარჯები 5.2%-ით გაიზარდა და 724.1 მილიარდ დოლარს მიაღწია.
წლევანდელი Global 2000-ის სიაში მოხვედრილ საცალო ვაჭრობის 80 კომპანიას შორის რეიტინგში ხუთი ახალწვეულია. შინაური ცხოველების სავაჭრო ცენტრი Chewy, ერთადერთი ახალწვეული ამერიკული კომპანია, 755 პოზიციით დაწინაურდა და ამჟამად 1554-ე ადგილზეა. Chewy-მ შედეგები ბოლო კვარტალში, ორწლიანი კლების შემდეგ, მომხმარებელთა ზრდის წყალობით გააუმჯობესა. მისი შემოსავლები 11.8 მილიარდ დოლარამდე გაიზარდა, რაც წლიურ ჭრილში 6.4%-იან ზრდას გულისხმობს.
სხვა ახალწვეულებს შორისაა ბრაზილიური საცალო ვაჭრობის ქსელი Lojas Americanas. კომპანია 2024 წელს ბუღალტრული სკანდალის გამო გაკოტრების გამოცხადების შემდეგ ნელ-ნელა შეიცვალა. ამჟამად 206 მილიონი დოლარის ღირებულების Lojas Americanas-ი გეგმავს საკრედიტო ბარათების პროგრამის და ლოიალობის ახალი პროგრამის დანერგვას, როგორც გაკოტრების შემდგომი რესტრუქტურიზაციის ნაწილს.
გერმანულმა საცალო ვაჭრობის კომპანია Zalando-მ, რომელიც მომხმარებლებს შორის თავისი ტექნოლოგიური მიდგომით არის ცნობილი, გასულ წელს გაყიდვების 4%-იანი ზრდა აჩვენა. მაჩვენებელმა 11.4 მილიარდ დოლარს მიაღწია.
მიუხედავად ამისა, მსოფლიო მასშტაბით საცალო ვაჭრობაზე ტარიფების გავლენა აშკარაა. აშშ-ის საცალო ვაჭრობის კომპანიებმა Target-მა (#242), Best Buy-მ (#907) და Macy’s-მა (#1,327) წლის შემოსავლებისა და მოგების პროგნოზი უკვე შეამცირეს.
2025 წლის Global 2000-ის ტოპ-10-ში საცალო ვაჭრობის ერთი კომპანიაა
| ადგილი | სახელი | სათავო ოფისი | ინდუსტრია | გაყიდვები | მოგება | აქტივები | საბაზრო ღირებულება |
|---|---|---|---|---|---|---|---|
| 1 | JPMorganChase | შეერთებული შტატები | ბანკინგი | $285.11 მლრდ | $59.36 მლრდ | $4,357.86 მლრდ | $677.8 მლრდ |
| 2 | Berkshire Hathaway | შეერთებული შტატები | დაზღვევა | $371.43 მლრდ | $89 მლრდ | $1,153.88 მლრდ | $1,145.46 მლრდ |
| 3 | ICBC | ჩინეთი | ბანკინგი | $221.96 მლრდ | $50.84 მლრდ | $6,688.6 მლრდ | $251.33 მლრდ |
| 4 | Saudi Aramco Oil Company | საუდის არაბეთი | ნავთობი და გაზი | $480.15 მლრდ | $104.97 მლრდ | $645.03 მლრდ | $1,663.38 მლრდ |
| 5 | Amazon | შეერთებული შტატები | საცალო ვაჭრობა | $637.96 მლრდ | $59.25 მლრდ | $624.89 მლრდ | $2,005.64 მლრდ |
| 6 | Bank of America | შეერთებული შტატები | ბანკინგი | $196.53 მლრდ | $27.85 მლრდ | $3,349.42 მლრდ | $300.06 მლრდ |
| 7 | China Construction Bank | ჩინეთი | ბანკინგი | $196.71 მლრდ | $46.64 მლრდ | $5,558.26 მლრდ | $219.81 მლრდ |
| 8 | Agricultural Bank of China | ჩინეთი | ბანკინგი | $198.02 მლრდ | $39.2 მლრდ | $5,923.64 მლრდ | $212.51 მლრდ |
| 9 | Alphabet | შეერთებული შტატები | IT პროგრამული უზრუნველყოფა | $359.31 მლრდ | $111 მლრდ | $475.37 მლრდ | $1,973.64 მლრდ |
| 9 | Microsoft | შეერთებული შტატები | IT პროგრამული უზრუნველყოფა | $261.8 მლრდ | $92.75 მლრდ | $533.9 მლრდ | $2,913.01 მლრდ |